ఎర్ర గులాబి

ఏ ప్రియుడి చేతిలో చేరి
ఏ చెలియ అలుక తీర్చాలా అని..
ఏ కన్నె సిగలో చేరి
ఎన్ని వగలు చూపాలా అని..
ఎన్ని హృదయాల మూగ భావాలు
ప్రేమగా మలచి వివరించాలా అని..
ఆలోచిస్తూ అందంగా ముస్తాబై
మంచు ముత్యాల చెక్కిలిగిలికి
చిలిపిగా సిగ్గుపడుతూ
చేరుకోబోయే చేతుల కోసం నిరీక్షిస్తూ...ఓ ఎర్ర గులాబి

అతడు

చాలా చెప్పాలనుకున్నాను అతనికి
కాని ఏమి చెప్పాలో తెలియని పరిస్థితి
ఎన్ని చెప్పినా ఇంకా చెప్పాలనిపిస్తుంది
ఎంత మాట్లాడినా తక్కువే అనిపిస్తుంది
అతను ఎదుటపడితే తప్పుకుంటాను
ఒక క్షణం కనిపించకపోతే తపించిపోతాను
అతడు చూస్తూవుంటే తల వంచుకుంటాను
చూడకపోతే బాధపడుతుంటాను
నన్ను చూసి నవ్వుతుంటే తడబడిపోతాను
ఎవరూ లేని సమయం లో చాటుగా
అతన్ని చూస్తూ నిలబడిపొతాను
ఇలా వెంటపడుతున్నావేమిటని తిట్టాలనిపిస్తుంది కానీ....
మరుక్షణం అలా చేస్తూ వుంటేనే బాగుందనిపిస్తుంది
నాలో కలిగే ఈ భావనలకి పేరేమిటి?
ప్రేమా?ఆకర్షణా?