నువ్వు

నాపక్కనే నువ్వు !

మన మధ్య 

కొన్ని పాటలు - వేల మాటలు!

నాతో నువ్వు! 

తోడుగా  కాసేపు 

పాలపిట్టలు - వానచినుకులు!

మిగిలింది మనిద్దరమే ...

ఏమైపోయాయో మరి 

పచ్చటిచెట్లు -  సెలయేళ్ళూ !

నువ్వు రాలేదని

బంగారం  

నీకోసమని చేసిన టీ... మరిగీ మరిగీ

పాపం 

మొహం మాడ్చుకుంది

నీ కబుర్లేవో విందామనుకున్న త్రో బ్లాంకెట్

ఎదురుచూసీ చూసి   

అదిగో సోఫాలో ముడుచుకు కూర్చుంది  

నువ్వు పక్కనలేకుండానే ఇంకోరోజు  గడిచిపోయింది .... 

నీ నవ్వుల జ్ఞాపకాలు మిగల్చకుండానే 

ఈసాయంత్రం కూడా వెళ్ళిపోయింది  !

బంగారం

బంగారం !  

నువ్వొచ్చేసరికి కళ్ళకి భాష నేర్పి 

మాటకి సాయంగా ఉండమనాలి 

పొద్దుటినుంచి దాచిన ఊసులన్నీ 

నీ ముందు పరచాలికదా! 

నువ్వొచ్చేసరికి కాలాన్ని జయించే 

సాధన ఏదో చెయ్యాలి 

నీ ఆలోచనల్లో  కరిగిపోయిన  క్షణాలని 

నీ సమక్షంలోకి తిరిగి తీసుకురావాలి కదా!

ఎదురుచూస్తూ

నువ్వొస్తావని ఉత్సాహం గా పరుగులెడుతూ  మనసు

ఇష్టం గా ఎదురుచూస్తూ కళ్ళు

నీ ఆలోచనల్లో కాలం

నీకోసం ఓ ప్రాణం 

ఇప్పటికి  ఇంతే  బంగారం!

ఉండిపోరాదే

బంగారం....

నిన్ను పంపటం నాకెప్పుడూ కష్టమే !

ముసురు పట్టిన ఆకాశం లా

మనసంతా దిగులేదో కమ్ముకుంటుంది!

కళ్ళు తడి మేఘాలై 

గొంతులో ఏదో అడ్డం పడినట్టనిపిస్తుంది!

ఊరెళుతున్న అమ్మని చూసి 

కాళ్ళకడ్డంపడుతూ ఏడ్చే బిడ్డలా

నిన్ను ఆపేయాలనిపిస్తుంది !

నాతో ఉండిపోడానికి

అసలేమౌతావన్న ప్రశ్నేదో

ఒక్కసారిగా లోకంలోకి తెచ్చిపడేస్తుంది !

కానీ మళ్ళా వస్తాననే నీ భరోసా  మాత్రం 

ఎన్నాళ్ళైనా ఎదురుచూసేలా చేస్తుంది !