తెలుసుకో నేస్తం

చిరునవ్వు విలువెంతో
అందుకొన్న అతిధినడుగు!
సూటి మాట పదునెంతో
గాయపడిన మనసునడుగు!
జారిన కన్నీటి బరువెంతో
తేలికపడిన గుండెనడుగు!
చివరికి మిగిలేదేమిటో
కాలు నిలవని కాలాన్నడుగు!

అతడు

చాలా చెప్పాలనుకున్నాను అతనికి
కాని ఏమి చెప్పాలో తెలియని పరిస్థితి
ఎన్ని చెప్పినా ఇంకా చెప్పాలనిపిస్తుంది
ఎంత మాట్లాడినా తక్కువే అనిపిస్తుంది
అతను ఎదుటపడితే తప్పుకుంటాను
ఒక క్షణం కనిపించకపోతే తపించిపోతాను
అతడు చూస్తూవుంటే తల వంచుకుంటాను
చూడకపోతే బాధపడుతుంటాను
నన్ను చూసి నవ్వుతుంటే తడబడిపోతాను
ఎవరూ లేని సమయం లో చాటుగా
అతన్ని చూస్తూ నిలబడిపొతాను
ఇలా వెంటపడుతున్నావేమిటని తిట్టాలనిపిస్తుంది కానీ....
మరుక్షణం అలా చేస్తూ వుంటేనే బాగుందనిపిస్తుంది
నాలో కలిగే ఈ భావనలకి పేరేమిటి?
ప్రేమా?ఆకర్షణా?

కవిత‌

మనసు లోని భావాలు
మాటలుగా చెప్పలేనివేళ
అవి కలలై ..అలలై
అనుభూతుల తుఫానులు చెలరేగి
యద తీరాన్ని తాకినప్పుడు
మదిలోయల్లోంచి పలికేదే కవిత